|
Ульяновскида татар яшьләренең “Ак Барс” оешмасы төзелде — Татар-информ МА
(Ульяновски, 22 гыйнвар, “Татар-информ”, Исхак Хәлимов). Ульяновски шәһәренең Ислам мәдәни үзәгендә татар яшьләренең җыелышы булып узды. Анда Бөтендөнья татар яшьләре форумының бюро әгъзалары да катнашты. Өлкә мөселманнарының Үзәк дини идарәсе вәкиле Илдар Усманов җыелышның максатлары хакында бәян итте.
— Кызганычка каршы, татар егет-кызларының шактый өлеше бозыклык юлына баскан: аракы эчәләр, тәмәке тарталар. Алар арасында наркоманнар һәм җинаятьчеләр дә юк түгел. Катнаш никахлар санының елдан-ел арта баруы да күпләрне борчуга сала. Бүген безнең алда яшьләргә ярдәм кулы сузу, аларны туры юлга бастыру, иманга кайтару бурычы тора. Шушы максаттан чыгып, төбәгебездә яшәүче татар яшьләренең “Ак Барс” дип исемләнгән иҗтимагый оешмасын булдырырга ниятләдек, — диде Илдар Усманов.
Ә татар яшьләре форумының бюро рәисе Илшат Сәетов яңа оешманы тулы көчкә эшләтеп җибәрү юллары турында тәфсилләп сөйләде.
— Ульяновскига мәркәзебез Казаннан белгечләр китереп, ислам дине буенча лекцияләр, төрле тренинглар үткәрергә ниятлибез. Ә яшьләрне бюро тарафыннан оештырылган Татар яшьләре көннәрендә һәм “Татар егете”, “Татар гүзәле”, “Татар сүзе”, “Татар сәхнәсе”, “ХХI нче гасыр мәхәлләсе” бәйгеләрендә катнашырга чакырыбыз. Әлбәттә инде, бу конкурсларның төбәк этабын үзегездә уздыру мәслихәт, — диде Илшат Сәетов.
Җыелышта катнашучы яшьләр Ульяновски шәһәрендә мөселман сабыйлары өчен аерым балалар бакчасы булдыру, мәктәпне тәмамлаучы егет-кызларны Казанның югары уку йортларына махсус квоталар буенча укырга кертү, татар язучыларының китапларын юнәтү мәсьәләсен күтәреп чыктылар.
Татар яшьләре үзләрен борчыган проблемалар хакында фикер алышканнан соң, “Ак Барс” дип аталган оешма булдыру турында карар кабул иттеләр. Аның рәисе итеп иманлы, милләт җанлы егетебез Илдар Усманов сайланды. Оешмада мәдәният мәсьәләләре белән Ульяновски педуниверситетының тарих факультеты студенты Рафаэль Дәвәтаев шөгыльләнәчәк.
Илдар Усманов әйтүенчә, “Ак Барс” оешмасы татар-мөселман яшьләренә рухи-әхлакый тәрбия иңдерү, милли мәдәният һәм спортны үстерү, сәламәт яшәү рәвешен пропагандалау өстендә эшләргә ниятли.
tatar-inform.ru
Новости оперативно узнаем в нашем телеграм-канале.
